Суббота, 20.07.2019, 02:24
BR - мои воспоминания
На главную страницу Регистрация Войти
Хара Суор приветствует тебя, Гость · RSS
Поиск
Что на сайте?
Статистика сайта

Сейчас на сайте: 1
Гостей: 1
Своих людей: 0
 Мои воспоминания
Главная » 2010 » Март » 3 » Автомобиль дуу, Запорожец дуу?
Автомобиль дуу, Запорожец дуу?
15:19

   Мин кып-кыра дэриэбинэҕэ төрөөбүт-үөскээбит киһибин. Оҕо эрдэхпинэ биһиэхэ массыына диэн суоҕун кэриэтэ этэ. Арай Ананий диэн бэрт бытаан айаннаах суоппар бастаан ГАЗ-51, онтон ГАЗ-52 диэн массыыналары ыытар буолара. Багдааһын Никиитэ диэн киһи бэрт эргэ КАВЗ оптуобуска суоппардыыра. Билэр инигит, ГАЗ-51 курдук капоттаах оптуобуһу? Билбэт буоллаххытына мин этэрим биир - эһиги кыракый оҕолор эбиккит, ол иһин билбэккит :)
   Биһиги Никиитэ оптуобуһун "душегубка" диэн ааттыыр этибит, тоҕо диэтэргит турбатынан массыына кэннин диэки тахсан барыахтаах куһаҕан гааһа салон иһигэр киирэр этэ. Оо, бэрт элбэх киһи тулуйбакка хотуолаабыт оптуобуһа буоллаҕа! Айабын да! Мин да сорох түгэннэргэ тулуйбатах буолуохтаахпын, туох кистэлэ баарый? Онтон киһи кыбыстара туох да суох курдук саныыбын. Дэриэбинэттэн оройуон киинигэр диэри биэс чаас устата "душегубкаланар" этибит. Дьолго, биир да киһи гааска тумнастан таҥаралаабатаҕа.
   Чэ, ити хааллын, аны кыра массыыналар тустарынан кэпсиим.
   Ээ, кэпсиим диибин да, туох да кэпсиирим суох эбит. Тоҕо диэтэргит оннук массыына биһиги дэриэбинэбитигэр суох этэ. Ол эрээри бастакы легковой массыына кэлэрин бэҕэһээ курдук өйдүүбүн.
   Арай биирдэ биһиги оскуола иккис этээһиттэн көрүдүөр түннүгүнэн ону-маны көрө турдахпытына оскуола дириэктэрин тиэргэнигэр кыра массыынаны кузовыгар тиэммит улахан таһаҕас тиэйэр массыына киирдэ. "Оо, көрүҥ, кыра массыынаны аҕаллылар!" - биһиги омун-төлөн буоллубут. Атын оҕолор итиччэни истэн баран түннүккэ саба сырсан кэллилэр. Киһи сатаан көрүө да суох улүгэрэ буолла. Таһырдьа сүүрэн тахсан көрүөхпүтүн тымныыта бэрт.
   Дириэктэрдээх хас да буоланнар халыҥ хаптаһыннарынан тыраап оҥорон баран массыыналарын кузовтан түһэрдилэр. Маҥан өҥнөөх, бэрт кэрэ сэбэрэлээх сабыс-саҥа массыына буолан биэрдэ. Ханнык массыына буоллаҕай диэн таайыы буолла. Онуоха Коля диэн уол боччумнаах баҕайтык туттан туран билээҕимсийдэ: "Автомобиль дуу, запорожец дуу быһыылаах". Ким да ону утарбата.
   Кэлин билбиппит, кырдьык Запорожец эбит, ЗАЗ-966 диэн мааркалаах.


Просмотров: 827 | Добавил: br
Анатолий Иванов. При любом использовании материалов сайта ссылка (для интернет-ресурсов — гиперссылка) обязательна © 2019
Тук-тук! Войдите!
Календарь обновлений
«  Март 2010  »
ПнВтСрЧтПтСбВс
1234567
891011121314
15161718192021
22232425262728
293031
Мой архив
Разное


Моя кнопка:
Black Raven - мысли, воспоминания, рассказы
HTML-код кнопки:


К коду вы можете добавить параметр target="_blank". Это на ваше усмотрение.